Trjebin (SN/mb). Na sportnišću w Miłorazu njemóže so planowany camp klimowych aktiwistow wotměć: Wone je podworane a hnojene – wot gmejny Trjebin, kaž tuchwilu amtěrowacy wjesnjanosta Robert Sprejz njedźelu składnostnje demonstracije třista domoródnych praji. Oficielna přičina: „To bě mokreho nalěća dla trěbne.“ Z wida klimowych aktiwistow je Miłoraz dalši „Lützerath“; woni běchu za jutře popołdnju zaměstnjenje klimoweho campa připowědźili. Móžnu nowu městnosć tuchwilu wozjewić nochcedźa, zo „njeby gmejna ju zaso skóncować móhła“, kaž su na Twitteru zdźělili. Tam pod hashtagom #rosibleibt agěruja. Mjeztym eksistuje tež serbska wersija #MiłorazWostanje.