3 500 wopytowarjow na wikach přirody w Stróži zličili
Stróža (CS/SN). Byrnjež wjedro lětsa z organizatorami 20. němsko-serbskich wikow přirody w Stróži tak derje njeměniło, hižo dopołdnja mnozy wopytowarjo na dwór zarjadnistwa biosferoweho rezerwata Hornjołužiska hola a haty w Stróži pola Hućiny přichadźachu. Wječor při bilancowanju móžachu dohromady něhdźe 3 500 wopytowarjow zličić.
Zarjadowanje je sej w běhu lět dobre mjeno wutworiło a je mjeztym daloko za hranicami Budyskeho a Zhorjelskeho wokrjesa znate. Wopytowarjo waža sej přećelnu a přijomnu atmosferu a tohorunja fakt, zo móžeš so na městnje z regionalnymi wudźěłkami zastarać. Mnozy wobstarachu sej w Stróži rostliny za zahrodu a balkon a woptachu speciality najwšelakorišich poskićowarjow. Rjemjeslnikam móžachu zajimcy při jich dźěle přihladować a tak nazhonić, kak chošćo a keramiske wudźěłki nastanu abo kak so kosa prawje klepa. Tež kobjeler Thomas Scheffel z Minakała bě ze swojim stejnišćom zastupjeny. Jeho najnowša wosebitosć su korby z rozdźělnymi barbami.
