Na kubłanskej konferency Wojerec mnohe ideje za přichod rozjimali
Wojerecy (SN/MiR). Wojerowski měšćanosta Mirko Pink witaše wčera dopołdnja nimale 200 zajimcow do Łužiskeje hale města. Jich zaměr běše zhonić, što je so w běhu jednoho lěta na polu kubłanja w měsće stało, to rěka, kotre nastorki je měšćanski zarjad ze swojimi partnerami z dotalneje kubłanskeje diskusije sćělesnił. Zakład toho běše prěnja kubłanska konferenca, kotraž bě so loni z wotmysłom wotměła, so nadrobnje z prašenjemi kubłanja w změnje strukturow zaběrać. Mirko Pink je přitomnym, mjez kotrymiž běchu wšelacy nošerjo dźěćacych dnjowych přebywanišćow, wučerjo a wučerki, kubłarjo a kubłarki, zastupjerjo politiki, předewzaćow, sporta, socialneho dźěła, měšćanskich zarjadnišćow kaž tež zastupjerjo zajimow Serbow a dalši, šěsć wobsahowych kompleksow zbližił. Wone pokazuja na to, zo je trjeba, wo podatych wobłukach kubłanja, kotrež je do wšitkich towaršnostnych wobłukow zapřijate, dale rěčeć a za wotewrjene prašenja rozrisanje namakać.
