Worklečanska šulska meja powalena a přidatnje hišće rozrězana

Worklecy (MG/SN). Zo so w Serbach hdys a hdys meje na wsach dočasnje podrězuja abo powaleja, drje nikomu nowum njeje, wšako słuša to tež někak k nałožkam kołowokoło meje k tomu. Wosebita šamałosć pak sta so nětko we Worklečanskej šuli. Tam běchu šulerjo 9. lětnikow minjeny pjatk pletwu a wěnc wili a na to meju swjatočnje stajili. W nocy na sobotu njeznaći meju powalichu. Po wšěm zdaću jim to hišće njedosahaše, přetož w nocy na 1. meju skućićeljo meju tež hišće srjedźa rozrězachu.

Šulerjo a wučerjo po wuprajenju šulskeje nawodnicy Diany Šołćineje „za to žane zrozumjenja nimaja a su šokowani“. Za njemało wučerjow powěsć wo rozrězanej meji swjatk prěnjeje meje porjadnje skazy, kaž wona dale praji. Tež wjesnjanosta Clemens Poldrack je zludany. Wón zdźěli: „Skutk raznje zasudźuju. To je wandalizm Serbam a wosebje šulerjam napřećo.“ Wjesnjanostu wosebje zrudźi, zo so nałožowana próca šulerjow na tak hanjace wašnje wonječesći.