Budyšink (LTh/SN). Wo dalšu atrakciju bohatši je Budyski kraj ze sobotneho swětoweho dnja pčołkow. Na dostojne wašnje su w Budyšinku šćežku po slědach Hadama Bohuchwała Šěracha wotewrěli. Podawk bě wobstatk wopomjatneho lěta na česć fararja a slědźerja wo pčołkach. Jeho 250. posmjertniny spočatk apryla w Budyšinku woswjećachu. Swjatočne wopomnjeće na jeho 300. po­smjertne narodniny budźe klětu spočatk septembra w ródnych Nosaćicach ­(Nostitz) pola Wósporka.

Hibićiwy wuměnkar, zahority pčołar a iniciator wopomnjeća, něhdyši wjesnjanosta Malešanskeje gmejny Günter ­Sodan, wotewri zhromadnje z fararjom tamnišeje wosady swjatočnosć w Budyšinkskej cyrkwi. Hudźbnikaj Serbskeho ludoweho ansambla zapiskaštaj na dudach a fujarje. Přitomni podachu so na něhdźe štyri kilometry dołhi „Šěrachowy kołopuć“. Nimo prěnjeje tafle na česć swětoznateho pčołarja a serbskeho wótčinca při cyrkwi, kotraž so hižo w aprylu wotkry, běchu štyri dalše tafle nastajili, ­kotrež dopominaja na skutkowanje Hadama Bohuchwała Šěracha jako pčołarja a wědomostnika.