Rowno (JoS/SN). Po štyrjoch lětach je na Rownjanskim Njepilic statoku wuměłska twórba zaso widźeć, kotraž bě do toho po wšěm zdaću zhubjena. Wobraz pochadźa z Rownjanskeje Witaj-pěstowarnje „Milenka“, hdźež bě w lěće 2019 nastał. K tehdyšemu 20lětnemu wobstaću Njepilic statoka je jón pěstowarnja dariła. Po tym zo su jón nětko zaso namakali, su wobraz před wjedrom škitany tak powěsnyli, zo jón kóždy wopytowar hnydom widźi.
Na nastaću wobraza wobdźěleny bě před štyrjomi lětami Rownjan a wučer na Slepjanskej wyšej šuli Jörg Tausch. „Pěstowarnja so mje tehdy prašeše, hač móhł při projekće pomhać, w kotrymž so dźěći wulkeje skupiny z wuměłskimi prašenjemi rozestajeja“, Jörg Tausch powěda. Tuž so za „Serbske powědki“ rozsudźichu. Na to so dźěći a wučer wjacore razy zetkachu, zo bychu so z wobsahom zaběrali. Při tym je pěstowarnja literarno-tradicionelny dźěl přewzała, Tausch pak wuměłske zwoprawdźenje.