Fifolenje ptačkow tuchwilu na Budyskim hrodźe słyšeć njeje. Skerje klinči wottam klepanje hamorow a šumjenje mašinow. Bórze wšak budu tam hrajerjo widźeć. Němsko-Serbske ludowe dźiwadło přihotuje so na swoje 27. Budyske lětnje dźiwadło.

Budyšin (SN/MiR). Do přihotow na lěćny wjeršk słuša kóžde lěto znowa tež ropot mašinow a wołanje dźěłaćerjow, kotřiž maja twar jewišća a přihladowarskich trawersow na starosći. Za wobydlerjow, kotřiž před murjemi naměsta bydla, je to mjeztym zwučene počinanje. Tuž nastajeja so woni přeco zaso – znajmjeńša ći, kotřiž tam dlěje bydla – na list, kotryž zwjetša w aprylu dóstawaja. W nim intendant NSLDź Lutz Hillmann pisa, kotre wobćežowanja na wobydlerjow čakaja. „Kaž loni hižo je na- a wottwar z wobmjezowanjemi za wobydlerjow Budyskeho stareho města zwjazane“, w lisće steji a zamołwići proša wo zrozumjenje.