Kupa wosrjedź hata ma we Worklecach nowe wjesne srjedźišćo być

Worklecy (SN/MWj). Jako běchu před lětami we Worklecach wot wulkeje na mału kupu móst instalowali, drje sej hišće nichtó tak prawje předstajić njemóžeše, zo móhli tam raz nowe wjesne srjedźišćo wutworić. Mjeztym njejsu jenož plany poměrnje konkretne, ale tež pjenjezy su zaručene. We wobłuku wubědźowanja Simul+ doby gmejna loni 100 000 eurow za projekt „Kupa komunikacije, kreatiwity a kultury“. Dale je so komuna nětko wuspěšnje wo spěchowanske srědki z programa za witalne wjesne srjedźišća požadała. Tuž je cyłkowna twarska suma 250 000 eurow zaručena, rjekny Katrin Kubašowa z Worklečanskeho wjesneho towarstwa na zašłym posedźenju gmejnskeje rady.