Bóšicy (SN/MiR). Njewšědna wěc je so w Bóšičanskej gmejnje stała – znajmjeńša za Hory to wona je. Wo tym je wjesnjanosta Bóšičanskeje gmejny Stanij Ryćer (rjemjesło Bóšicy) na zeńdźenju gmejnskeje rady wčera informował. Zwonka wsy je gmejna před něšto lětami, runje tak kaž w dalšich wsach přisłušacych gmejnje připrawiła wočerstwjenišćo, drjewjanej ławce z blidom, pod třěchu. W Horje pokazowaše tafla na wosebity geologiski dypk w krajinje, kotraž je z časa lodowcow charakterizowana. Před něšto dnjemi běchu wjesnjenjo z Hory zwěsćili, zo je wočerstwjenišćo wobškodźene. Prawdźepodobnje běchu skućićeljo połne piwowe bleše na informaciske tafle z aluminija mjetali, tak zo so tute zhibowachu. Zdobom bu tam stejaca ławka wobškodźena. Přichodne dny maja so wobnowjene tafle kaž tež nowa ławka zaso nastajić. Wo to staraja so młodostni z gmejny z podpěru staršich kaž tež ćěsla, kiž nowu ławku zhotowja.