Z baćonjacych rynkow tójšto informacijow wučitać

štwórtk, 20. julija 2023
artikl hódnoćić
(0 )
Za wopjeršćenjenje baćonow su ornitologojo w zašłosći rozdźělne rynki wužiwali. Zeleny plastowy zasadźeja dźensa w Pólskej.  Foto: Handrij Baumgärtel Za wopjeršćenjenje baćonow su ornitologojo w zašłosći rozdźělne rynki wužiwali. Zeleny plastowy zasadźeja dźensa w Pólskej. Foto: Handrij Baumgärtel

Njeswačidło (HB/SN). Kónc junija staj sobudźěłaćerjej spěchowanskeho towarstwa Njeswačanskeje ptakoškitneje stacije na wjacorych městnach Budyskeho wokrjesa młode baćony wopjeršćeniłoj. Zaměr kóždolětneje akcije je, baćony wědomostnje přeslědźić. Něhdźe 50 młodźatam kóžde lěto we wokrjesu rynki přitykuja. Tele dźěło wukonjeć smě jenož tón, kiž je so w kursu za to kwalifikował. Registrowane rynki skaza fachowc w centrali za wopjeršćenjenje w Güstrowje. W Němskej wužiwachu wot lěta 2003 hač do 2015 čorne tak mjenowane ELSA-rynki (European Laser Signed Advanced Ring). Wot lěta 2017 wužiwachu metalowe rynki a wot 2020 žołte z kumštneje maćizny, kotrež hodźa so lěpje wotčitać. W Čěskej zasadźuja ELSA-rynki kaž tež wuske metalowe rynki Praskeho narodneho muzeja. W Pólskej wužiwaja tohorunja ELSA-rynki a nimo toho zelene plastowe. Dźakowano rynce fachowc zhoni, hdźe je so baćon narodźił, hdźe bu wopjeršćenjeny a hdźe je jeho něchtó wuhladał a swoje wobkedźbowanje zdźělił. Wosebje zajimawe je, hdyž wobkedźbuja baćona na jeho ćahanju a nic na jeho hnězdźenskim městnje we Łužicy.

wozjewjene w: Łužica
Prošu přizjewće so, chceće-li komentar podać

nowostki LND