Budyski sejmik wčera noworjadowanje wólbnych wokrjesow schwalił

Budyšin (SN/MiP). Po zwučenym wašnju běše krajny rada Udo Wićaz (CDU) na dnju schadźowanja Budyskeho wokrjesneho sejmika wčera popołdnju na nowinarski termin prosył, zo by zastupjerjow medijow nadrobnišo wo jednotliwych dypkach na agendźe posedźenja informował. Na dnjowym porjedźe daloko zady zaměstnjeny dypk běše: „Rozprawa wo zeskutkownjenju wustawkow k zachowanju, spěchowanju a wuwiću serbskeje rěče a kultury w lěće 2022“. Na naprašowanje k wobsahej a ćežišćam rozprawy wotmołwi krajny rada, zo sam to na tutym městnje wotmołwić njemóže. „Zamołwita fachowča, społnomócnjena za serbske naležnosće Halena Jancyna, je so dźensa rano chora přizjewiła. Ale rozprawa wšak je čista informaciska podłoha.“