W Serbskim domje su serbske rjemjesło a serbske drasty předstajili

Budyšin (CS/SN). Serbski dom běše pyšnje wobswětleny, zašłu sobotu, na dnju Budyskeje nakupowanskeje nocy z mjenom „Romantica“. Barbojtu pychu wšak wuhlada wopytowar tež znutřka domu, w rumnosćach Serbskeje kulturneje informacije (SKI). Tu móžeše wón serbskim rjemjeslnikam při dźěle přihladować. Sobudźěłaćer Załožby za serbski lud Syman Woko předstaji swoje filigranowe rjemjesło, kotrež je wot swojeho dźěda zdźědźił: wón pleće z nitkow połnych móličkich škleńčanych parličkow družće sački. Tute parlički běše dźěd Symana Woka hižo za swój čas w čěskim Jablonec nad Nisou wobstarał a to w tajkim mnóstwje, zo hišće na někotre lěta dosaha. Ralbičan Jurij Wjesela, wuwučeny zamkar a nětko na wuměnku, prezentowaše swoje wuměłske wudźěłki ze železa a kopora: wšelake debjenki na křižerskich gratach abo křiže při pućach. Wobšěrnu přehladku jeho tworjenja předstaji SKI tuchwilu tež we wosebitej wustajeńcy w tamnišich rumnosćach. Zajim publikuma na wudźěłkach Jurja Wjesele běše wulki.