Wojerecy (SiR/SN). Wojerwoski diakon Torsten Vogel je tež lětsa zaso žiwu adwentnu protyku „Stare město Wojerecy“ přihotował. Wón chce ju jako samostatnu akciju dale wjesć. Protyka je loni swój mjeztym hižo 20lětny jubilej woswjećiła. Vogel wopisuje ju „jako dołhu tradiciju z lěto a wjetšej zwjazanosću mjez akterami a wobdźělnikami“ na derje znatych a woblubowanych městnosćach wokoliny. Do nich słuša mjez druhim tež ewangelska Wojerowska Janska cyrkej. Po tradiciji so kóždy adwentny wječor, wot póndźele do soboty we 18 hodź. při cyrkwi započina. Wottud poda so skupina k rěznistwu Sinapiusec swójby – najstaršeho rěznistwa Sakskeje. We wukładnych woknach rěznistwa Boži narodk krok po kroku rosće. Kóždy dźeń so dalša figura přidruži. Wosebitosć je, zo smě kóždy wječor jedne dźěćo jednu figuru z Božeho narodka sobu domoj wzać. Přez nóc smě dźěćo jej potom takrjec schow dać, prjedy hač jón na druhi wječor zaso do wukładneho wokna staji.