Rozdźělne měnjenja k wutwarej zwjazkoweje dróhi B 156

Zdźěr/Čelchow (UM/SN). „Wjesołe poselstwo“ mjenowaše Sakska krajna direkcija w meji 2023 wobzamknjenje planoweho zwěsćenja za wutwar zwjazkoweje dróhi B 156 wot Brězynki hač do Zdźěrje. Předewšěm dojězdźowarjo, ale tež pěškojo, kolesowarjo a ludźo z handicapom bychu wot dróhotwara profitowali, tehdy prezidentka Regine Kraushaar zdźěli.

Wšudźe pak so nad planowanym dróhotwarom njewjesela. Předewšěm ratarske zawody skorža, zo wjetše mnóstwo polow a łukow zhubja. Nimo Zdźěrjanskeje Holanskeje farmy su tež wjacore mjeńše zawody potrjechene. „Bjez priwatneho wobsydstwa so zaměry twarskeje naprawy docpěć njehodźa“, krajna direkcija k tomu zwěsća. Druhe warianty drje su pruwowali, wone pak wopokazachu so jako njekmane. Krajna direkcija přilubi, zo wšitke přijězdy na pola a łuki wobchowaja abo je po twarskich dźěłach zaso připrawja. Žadanju Zdźěrjanskeje Holanskeje farmy, přijězd k jeje kuchni a k składej běrnow za wšón čas twarskich dźěłow zaručić, wotpowěduje krajna direkcija z prowizoriskim přijězdom.