Budyšin (SN/bn). Serbski muzej w Budyšinje „móže znowa na wuspěšne lěto zhladować“, kaž za zjawnostne dźěło institucije zamołwita Monika Ošikowa zdźěli. Štyri wosebite wustajeńcy a dohromady 190 zarjadowanjow je dohromady wjace hač 14 800 wopytowarjow přiwabiło. K zarjadowanjam liča so wodźenja, přednoški, dźěłarnički, ekskursije zwonka muzeja a mnoho muzejo-pedagogiskich poskitkow.

Temy wosebitych wustajeńcow běchu „mnohotne a narěčachu ze swojimi wobsahami wšelake cilowe skupiny“. Wosebje wustajeńca „Čej’ da sy? Wurzeln im Wandel“ přićahowaše mnoho Serbow samych a „wuwabi diskusije wo přichodźe našeho ludu na narodnym a nabožnym polu. Serbski muzej wobhladuje so tak jako podium mjezsobneje wuměny a jako městno kulturno-towaršnostnych debatow“. Přez dalewjedźenje wosebiteje wustajeńcy „Alles ist Landschaft – Wšo je krajina – Wšykno jo krajina – Wszystko jest pejzażem“ wo serbskim wuměłcu Janje Buku w Pólskej „rozšěrja a pohłubša Serbski muzej swoje dotalne dźěło na polu mjezynarodnych poćahow a kooperacijow, kotrež budźe so tež w přichodnym lěće intensiwnje dale wjesć“.