Wšudźe při hłownych a pódlanskich pućach wuhladaš stajnje zaso najwšelakoriše wotpadki. Jich paleta saha wot prózdnych cigaretowych tyzow hač k piwowym a palencowym blešam. ­Tohodla wotměja so w měrcu zaso dny hromadźenja wotpadkow.

Budyšin (SN/MWj). Wot 4. do 24. měrca namołwjeja Njeswačanska přirodoškitna stacija, přirodoškitny centrum Hornjo­łužiski hórski kraj a wotpadkowy zarjad Budyskeho krajnoradneho zarjada k dnjam hromadźenja wotpadkow. Mjeztym třeći raz wuhornu sej ludźo w Budyskim wokrjesu stajnje w tydźenjach do jutrow rukawy a zhromadnje wotpadki hromadźa. Wuhotowani z rukajcami, měchami a zdźěla z přimadłami ćahnu woni po krajinje a wotpadki zběraja – wotpadki, kotrež druzy bjez přemyslowanja z awta ćisnu abo w najhóršim padźe samo w lěsu wotkładuja. Na te wašnje móžachu w minjenymaj lětomaj hižo wjacore kontejnery połne wotpadkow nazběrać a je tak fachowje wotstronić. Při tym njejednaše so jenož wo zbytki cigaretow, kofejowe nopaški abo bleše, ale ­samo wo awtowe wobruče a šrót.