Budyska šulska hwězdarnja wšitkim zajimcam wotewrjena

Budyšin (CS/SN/MiR). Budyska šulska hwězdarnja „Johannes Franz“ ze swojimi wjace hač 150lětnymi stawiznami je drje najstarša šulska hwězdarnja po cyłej Němskej. Minjene lěta pak běše eksistenca kubłanišća wjacekróć wohrožena. Akterojo běchu sej w tym přezjedni, zo dyrbi so hwězdarnja zachować, njepřezjedni běchu sej w tym, po kotrym puću. Tuž su wjacori angažowani njedawno towarstwo „Ad astra“ załožili, kotrehož předsyda je bywši jednaćel Budyskeje wobdźělenskeje a wobhospodarjenskeje towaršnosće (BBB) Volker Bartko. „Mi je hwězdarnja jara wažna“, Volker Bartko zwuraznja, „tuž sym zwólniwy był, załoženje noweho towarstwa organizować. To mjeztym zdokonjane, trěbne přizjewjenje na zarjadach běži. „Ad astra“ ma tuchwilu jědnaće čłonow, mjez nimi su někotři, kotřiž su ze spěchowanskeho towarstwa wustupili. „Dyrbimy nětko struktury wuwiwać a sej nowe zaměry stajeć“, praji Volker Bartko, „dyrbimy zwěsćić, kotru techniku trjebamy, zo móhli astronomisce dźěłać.“