W Sakskej bydli 34 črjódow w 41 teri­torijach, wobstatk wjelkow w Sakskej je so minjene lěta wobstajnje zwyšił. W Němskej je w cyłku 184 wjelčich črjódow. W Saksko-Anhaltskej a Braniborska je mjez 2 000 a 2 500 wjelkami.

Čorny Hodler (WM/SN). Wjelk w Němskej a Europje běše tema diskusijneho wječora njedawno w kantinje LAWI w Čornym Hodlerju. Kandidat za sakski krajny sejm Frank Hirche a zapósłanc zwjazkoweho sejma Hans Jürgen Thies (wobaj CDU) zaběraštaj so z temu „wjelki a ratarstwo“. 30 ratarjow a wowčerjow běše na zarjadowanje přichwatało. Thies jako čłon agrarneho wuběrka němskeho zwjazkoweho sejma rozłožowaše situaciju wjelkow w Němskej a Europje. Wot lěta 2000 hač do dźensa je po statistice za cyłu Saksku wjace hač 400 wjelčich nadpadow registrowanych. Znate tež je, zo wjelki w stadłach wužitneho skotu wosebje wulku škodu načinjeja. Lětnje płaći so potrjechenym narunanje we wysokosći 18 do 20 milionow eurow za nadpady wjelkow na stadła wowcow. To pak njedosaha. Frank Hirche rjekny, zo skedźbni so w lěće 2012 dla nadpadow wjelka na zwěrjata w Kulowje prěni króć na problem a zo je derje, temu dale wobjednać.