Gmejnska rada z tójšto nowymi radźićelemi w Pančicach-Kukowje

Pančicy-Kukow (JK/SN). Pančičansko-Kukowski wjesnjanosta Markus Kreuz (CDU) sćahny na spočatku prěnjeho dźěla wčerawšeho posedźenja gmejnskeje rady dobru bilancu dotalneho dźěła. Tónle dźěl wotmě so hišće w starej zestawje gmejnskeje rady a radźićeljo zhladowachu spokojom na wjacore wobnowjene dróhi, na to, zo pitna woda we wsach wokoło Wotrowa derje běži kaž tež na ponowjenu Pančičansku zakładnu „Šulu Ćišinskeho“. Najnowši projekt, areal na ležownosći něhdyšeje stareje korčmy, nabywa dźeń a jasniše kontury a stanje so ze spodobnym objektom w srjedźišću gmejny. Za tele předewzaće, kotrež płaći cyłkownje 430 000 eurow, je gmejna ze swójskich srědkow 10 000 eurow nałožowała. Dalše financielne srědki pochadźeja z dobyća we wubědźowanju simul+ abo ze spěchowanja. Na to je Markus Kreuz tych radźićelow, kotřiž hižo za gmejnsku radu kandidowali njeběchu abo so znowa njewuzwolichu, rozžohnował. Někotři z nich so na znowawuzwolenje w přichodnych wólbach nadźijeja.