Budyšin (CS/SN). Na wobydlerski forum nutřkowneho města, zašły štwórtk w Budyskim Kamjentnym domje je sej něhdźe 20 wopytowarjow dóšło. Ći běchu derje přihotowani a stajachu wyšemu měšćanosće Karstenej Vogtej (CDU, nal.) a měšćanostomaj dr. Robertej Böhmerej (2. wotl.) a Heikej Nowakej (napr.) dosć wužadace prašenja. Jedne ćežišćo běše běžny a parkowacy wobchad. Jednaše so při tym wo dalše postupowanje přećiwo tomu, zo so nutřkoměšćanske wobchody wopušća. W tym zwisku je Vogt pozitiwnu powěsć sposrědkował. Prózdnota w pasaži Žitnych wikow změje bórze swój kónc. Wšako ma tam Budyska wotnožka Krajneho zarjada za šulu a kubłanje (LASUB) zaćahnyć, kotraž ma swoje sydło tuchwilu hišće na Otta Nagelowej, w měšćanskej štwórći Strowotna studnja. Na to zhladujo, zo ma zarjad mnohich sobudźěłaćerjow, wočakuje wyši měšćanosta dźělne wožiwjenje nutřkowneho města. Nimo toho by so na tute wašnje tež problem z wandalizmom w podzemskej garaži pod pasažu na Žitnych wikach rozrisać hodźał. Zarjad ma hač do měrca 2025 přećahnyć.