We Wučkecach (Auschkowitz) hižo 60 lět chmjel plahuja. Na derje wopy­tanym dnju wotewrjenych duri je ­zawod zajimcow sobotu wo swojim dźěle informował.

Wučkecy (JK/SN). Štóž je po awtodróze A 4 z Budyšina do směra na Drježdźany po puću, wuhlada na polach krótko před Hornim Wujězdom wulke sćežory. Runje nětko jewi so tam młódna zeleń do wysoka rosćaceho chmjela. Tón plahuje we Wučkecach a wokolinje mjeztym hižo 60 lět bjez přetorhnjenja ratarski zawod „Tuchorski lěs“. Wuspěch wšak bě w běhu lět rozdźělny. Składnostnje lětušeho jubileja přeprosychu zamołwići zawoda zajimcow minjenu sobotu na informatiwny dźeń. Jednaćel zawoda Christoph Liebelt poda ze zajimawymi wobrazami a mnohimi informacijemi dohlad do wuwića předewzaća a pokaza na wosebitosće při plahowanju chmjela.