Wuměłc Mario Ošika wčera w Chrósćicach wustajeńcu wotewrěł
Chrósćicy (SN/MiP). Zwony Chróšćan cyrkwje běchu runje boži wječor dozwonili jako zaklinča pěseń Zejlerja a Kocora „Kóždy dźeń je lubosć nowa“ přez kopatu połnu sydarnju tamnišeho gmejnskeho zarjada. Za wčerawši dźeń wotewrjenja wustajeńcy z twórbami serbskeho wuměłca Marija Ošiki je sej dirigentka chóra Lipa Jadwiga Kaulfürstowa ze spěwarjemi wosebitu njepřipowědźenu překwapjenku přemysliła. Čłonojo chóra běchu so njenapadnje mjez hosćimi rozdźělili, tak zo zaklinčachu hłosy ze wšitkich stron rumnosće. W běhu wječora zahori chór publikum a wuměłca z dalšimi štyrjomi spěwami.
