Chrósćicy. Po wječorach, po tym zo su hosćo domoj šli, běchu hišće mnozy Chróšćenjo aktiwni a su so njesprócniwje ­gratu přimali. Woni rjedźachu blida, mjećechu a zrumowachu wotpadki, znosychu wšitko zaso na prawe městno – tam hdźež słuša. Běchu to mnozy čestnohamtscy pomocnicy-podpěraćeljo, kotřiž su lětušu 800. róčnicu Chróšćanskeje gmejny a wosady k njezapomnitemu podawkej sčinili.

Jedyn z hłownych organizatorow swjedźenskeho tydźenja bě wjesnjanosta Marko Kliman. „Bjeze čestnohamtskich pomocnikow naš wulki swjedźeń móžny był njeby“, wón dźakowny wuzběhnje. Hižo před třomi lětami su z planowanjemi ­započinali. W tutej zažnej fazy schadźowachu so wosebje čestnohamtsce skutkowacy gmejnscy a cyrkwinscy radźićeljo, zo bychu prěnje koncepty za swjedźeń naćisnyli.