Wjacori dobroćeljo Njebjelčansku gmejnu skutkownje podpěraja

Njebjelčicy (JK/SN). W napjatej finančnej situaciji gmejny Njebjelčicy je kóžda podpěra za gmejnu witana a dobra. Na wčerawšim posedźenju tamnišeje gmejnskeje rady přiwzachu radźićeljo wjacore, tež poměrnje wulke dary dobroćelow. Nimo podpěry we wysokosći 50 eurow za młodźinsku wohnjowu woboru wjeselachu so radźićeljo nad 500 eurami, kotrež je znaty dobroćel Pěskečanam za jich bórzomny swjedźeń 800. róčnicy wjeski přewostajił. To wjesce zawěsće při organizowanju a woswjećenju žadneho jubileja pomha. „Ptačka wottřěliła“ pak je firma Ziegler, kotraž je gmejnje, wosebje pak Njebjelčicam zjawne meble w hódnoće 18 849 eurow přewostajiła. Wulka to ­dobrota! Su to mjez druhim ławki a dalše přijomne wěcy, kotrež napohladej wjeski tyja.

Radźićeljo wšak skerje město wěcneho dara pjenjezy za mnohe naležnosće, ­kotrež maja so w gmejnje rjadować, trjebaja. Najebać to pak spokojom a dźakownje dary přiwzachu.