Mały Holešow (SN). Łuku ze sadowcami přeslědźili, ptače pjerja hromadźili a zwěsćili, ke kotrej ptačej družinje wone słušeja abo ryby w haće wobkedźbowali a wjace wo družinach rybow zhonili – to wšitko zmištrowachu dźěći a młodostni Budyskeho wokrjesa na Dnju młodych přirodoškitarjow (JuNa) minjenu sobotu w Małym Holešowje.

Na tamnišim rybarskim dworje su wjace hač 50 wobdźělnikow w zakładnych a dale wjeducych kursach na wšelakorych stacijach zhromadnje paslili, slědźili a hódali. Na tute wašnje přepruwowachu, skrućichu a rozšěrichu swoju přirodoškitnu wědu. Na kóncu spož­čichu jim organizatorojo – sobudźěła­ćerjo Budyskeje centrale za přirodu – mały dar kaž tež wopismo z certifikatom „Młody přirodoškitar lěta“.

Organizatorow podpěrali su angažowani starši kaž tež nawodźa JuNa-sku­pinow z wokrjesnych přirodoškitnych stacijow. To su: přirodoškitnej staciji w Gräfenhainje a w Njeswačidle, přirodoškitny centrum we Wjazońcy, spěchowanske towarstwo Sakska ptačernja kaž tež centrala za přirodu w Budyšinje.