Bórkhamor (JoS/SN). Składnostnje za­wróta słónca minjenu sobotu běše ­wjesne towarstwo w Bórkhamorje na mjeztym hižo 28. wjesny swjedźeń přepro­syło. Wjele wopytowarjow, tež ze su­sodnych wjeskow, běše najebać horcoty do Jantaroweje areny přišło. ­Najmłódši hosćo nadeńdźechu wulki ­poskitk zabawy na swjedźenišću. Dźěći móžachu so šminkować dać, na ko­pańcowe wrota třěleć, na skakanskim hrodźiku skakać abo jantar z pěska ­wusawać.

W kofejowym času zahudźi Grodkowska dujerska gilda. W swjedźenskim stanje a w chłódku štomow běše horcota znjesliwa. Tykanc běchu žony z Bórk­hamora kaž tež ze susodnych wsow napjekli. Najrjeńši to wuraz mjezsobneje zwjazanosće mjez wjesnjanami w gmejnje Sprjewiny Doł. Tykancowy bazar organizuje hižo wot prěnjeho wjesneho swjedźenja w lěće 1996 – potajkim 28 lět – Ute Köhler z jeje teamom.

Wjeršk na pózdnim popołdnju běše potom wosebite wurisanje – wubědźowanje kačkow – na Małej Sprjewi, na kotrymž so dohromady 100 tutych małych žołtych zwěrjatkow wobdźěli. Kački je wjesne towarstwo wjesnjanam předało, na kóncu běchu wšitke rozebrane.