Trjebin (AK/SN). „Gmejna Trjebin móže dźakowano solidnemu hospodarjenju w přichodnymaj lětomaj něhdźe 1,1 milion eurow inwestować“, to wuzběhny gmejnska komornica Dana Piehl zašłu srjedu na posedźenju gmejnskeje rady. W inwesticiskim planje steja mjez druhim: wjacegeneraciski dom, hala z pultowej třěchu, nowe nastroje na zjawnym wjesnym hrajkanišću a saněrowanje Sprjewineho mosta při Trjebinskim ­młynje. Z jednym přećiwnym hłosom ­je wjetšina radźićelow dwójny etat 2025/2026 wobzamknyła.

Za lětsa je gmejna dohromady 248 000 eurow za inwesticije w etaće zaplano­wała. Mjez druhim chce gmejna elektroniski zawěranski system při sportnišću instalować, za Trjebinsku dobrowólnu wohnjowu woboru nuzowy milinowy agregat wobstarać, dom towarstwow z fotowoltaikowej připrawu wuhotować a na Namjeznym puću nadróžne wobswětlenje ponowić. Za 2026 je gmejna 850 000 eurow za inwesticije w etaće zaplanowała. Najwažniša naprawa budźe klětu twar multifunkcionalneho twarjenja za wšitke generacije – jako přitwar při wohnjowej woborje w Trjebinje.