Klóšterska zahroda wulkotna kulisa za njewšědnje rjany wječor

Pančicy-Kukow (SN/MWj). Miły lětni wječor, na jewišću cunja hudźba, serbske reje, artistika a show z wohenjom, tysacy swěčkow w pisanych wobrazach a k tomu słódnosće za žołdk a kyrk – to bě měšeńca, kotraž je sobotu 1 400 wopytowarjam Nocy tysac swěčkow w klóšterskej zahrodźe w Pančicach-Kukowje wokřewjace hodźiny wobradźiła. Organizatorojo Křesćansko-socialneho kubłanskeho skutka wokoło Sonje Hejdušcyneje móžachu so na wjedrowu připowědź spušćeć, tak zo je so jich próca přihotowanja zadaniła. Tójšto ludźi, kotřiž chcychu sej hakle wječor lisćik kupić, su bohužel domoj pósłać dyrbjeli, dokelž bě maksimalna ličba wopytowarjow docpěta.