Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (7)
W Lejnom (Geierswalde) při jězoru ze samsnym mjenom bě do Druheje swětoweje wójny wot něhdźe 400 wobydlerjow wjac hač połojca serbska. Jako so w nowembru 1934 dwanaće muži k załoženskej zhromadźiznje wohnjoweje wobory zetka, rěčachu někotři z nich serbsce, tež prěni nawoda wobory Pawoł Petrik. Ličba kameradow drje so bórze po załoženju na 26 zwyši. Tola kónc wójny wobora hižo njeeksistowaše. Wšón swój zbywacy grat dyrbjachu wokrjesnej woborje přewostajić. Na iniciatiwu Matthiasa Šimanka woborne dźěło spočatk lěta 1946 wozrodźichu. 14 kameradow woborje spočatnje přisłušeše, lěto pozdźišo bě jich hižo 38. K jich wuhotowanju słušeše mjez druhim tehdy moderna sykawa TS8.
