Regina Krawcowa rozłožuje w Róžeńčanskim lěsu wužitk zelow a płodow

Smječkecy (BW/SN). Płody kerkow a štomow stejachu w srjedźišću zeloweho wuchodźowanja, na kotrež bě minjeny pjatk Regina Krawcowa ke Kamjentnemu hatej mjez Smječkecami a Róžantom přeprosyła. Byrnjež so na nim jenož dwě zajimči wobdźěliłoj, bě wodźenje po wječornej lětnjej přirodźe zajimawe a powučne.

55lětna kubłarka je w dnjowym přebywanišću „Při Krabatowym puću“ we Worklecach přistajena, hdźež organizuje poskitki za seniorow, wšako je so na pedagogowku za hojenske rostliny a zela wukubłać dała. Tež dalšim zajimcam w serbskej wokolinje posrědkuje na wodźenjach po přirodźe rady hódne a wužitne pokiwy, kak hodźi so naša domjaca přiroda wužiwać. Tak na přikład móžeš ­symješka žónskich kopřiwow sušić abo tež čerstwe za čaj naparić. Wone pom­haja při ćežach z pucherjom, rjedźa krej a skutkuja přećiwo mučnoće. Łopjena kopřiwy hodźa so tohorunja do solotwje změšeć abo w pónoji kaž spinat pjec.