Renaturěrowanje rěčki a jeje łučiny móhło na financach zwrěšćić

Njebjelčicy (SN/MiR). Sakski krajny zarjad za wobswět, ratarstwo a geologiju (LfULG) je zakónčacu rozprawu wo renaturěrowanju rěčki Jawora předpołožił. LfULG chce projekt z potrjechenymi partnerami zwoprawdźić, zwurazni referatny nawoda we wotrjedźe za wodu, pódu a wobtokowe hospodarstwo dr. Bernd Spänhoff. Do jich kruha słušeja mj. dr. Budyski krajnoradny zarjad, gmejnje Pančicy-Kukow a Njebjelčicy, Sakske krajne zarjadnistwo za rěčne zawěry, přirodoškitna organizacija BUND Sakska kaž tež měsće Kamjenc a Halštrow. „Nam je wědome, zo komunalne financy njedosahaja. Snano pak postupnje zhromadne rozrisanje namakamy.“ Spänhoff swoju podpěru poskićuje a iniciatorow naprawy a zamołwitych za wuwiće po­trjechenych gmejnow namołwja, zo bychu zwisk z LfULG nawjazali.