Hač do septembra wočakuja škitarjo wobswěta sudniski rozsud
Rowno (JoS/SN). Choćebuska wobswětowa skupina a zwjazkowe kontaktne městno za brunicu Zeleneje ligi stej njedźelu na lěćne kulturne zarjadowanje do lěsa pola Rownoho přeprosyłoj. Lěs tuchwilu wobswětowa skupina NABU wužiwa. Wochožanskeje jamy dla pak je wón wot wotbagrowanja wohroženy. Kaž sobustaw wobswětoweje skupiny René Šuster rozłoži, je lěs w priwatnym wobsydstwje. Wobsedźerjo su jón w lěće 2019 wobswětowej skupinje přenajeli. „Lěs wužiwamy za kulturne a kubłanske zarjadowanja. Naš cil je płoninu do přirodźe bliskeho měšaneho lěsa přetworić. Tohodla smy w zašłych lětach hižo pilnje lisćowe štomy sadźeli. 2021 je energijowy koncern LEAG próstwu wo wuswojenje zapodał. Tutej próstwje je Sakski wyši hórnistwowy zarjad w lěće 2024 přizwolił. Přećiwo tomu su wobsedźerjo lěsa skoržili. Ze skóržbu so nětko wyše zarjadniske sudnistwo w Budyšinje zaběra. Do awgusta drje sudnistwo wo tym njerozsudźi.“
