Bluń (AK/SN). W gmejnje Halštrowska Hola wutworja twarsku płoninu za ludźi, kotřiž chcedźa sej nowy dom natwarić. Na wuchodnej kromje Blunja ma bydlenska štwórć za dźesać jednoswójbnych abo dwójnych domow nastać. Prěni naćisk projekta je gmejnska rada na swojim zašłym posedźenju schwaliła.
Lětsa w aprylu su radźićeljo wobzamknyli, twarski plan nastajić. Kaž Heidrun Eger z gmejnskeho twarskeho zarjada nětko rozłoži, ma so nowa štwórć paralelnje k zwjazkowej dróze B 156 rozpřestrěć. Předwidźane su dwuposchodowe twarjenja. Hač do 60 procentow jednotliwych ležownosćow smě so zazyglować. Na ležownosćach smědźa so tež carporty a garaže natwarić. Nimo toho maja tam zelenišća kaž tež wobchadne płoniny nastać, Heidrun Eger rozjasni.
Přichodne měsacy smědźa wobydlerjo kaž tež potrjechene zarjady a dalši nošerjo zjawnych zajimow swoje stejišćo k planowanej bydlenskej štwórći zapodać. Jich pokiwy a přispomnjenja maja so do dalšeho planowanja zapřijeć. Na kóncu plan wužiwanja ležownosćow přiměrja, kaž na posedźenju gmejnskeje rady rozłožichu.
