Radwor/Zhorjelc (SN/MkWj). Zwučowanske lěhwo słuša za Radworski chór Meja runje kaž za druhe lajske chóry mjeztym do kruteho wobstatka cyłolětneho plana. Hižo na hłownej zhromadźiznje termin schwala.
Po lońšim wuspěšnym zwučowanskim lěhwje w Zhorjelcu su sej spěwarki a spěwarjo minjeny kónc tydźenja wospjet do města nad Nysu wulećeli. Přičina za druhi termin na samsnym městnje je jednora: Loni běchu přewšo spokojom. Lěta 2010 w starym měsće z ruinow dotwarjena młodownja skići ze swojimi modernymi rumnosćemi najlěpše wuměnjenja. Nimo toho leži wona wosrjedź stareho města a wabi w časach mjez probami do přechodźowanja.
Mjez intensiwnymi probami běchu zamołwići chóra wokoło předsydy Daniela Heniga lětsa nazorny program přihotowali. Tak pobychu zhromadnje při swjatym rowje na kromje stareho města. Putniske město běchu w srjedźowěku po přikładźe swjatych městnow w Jerusalemje natwarili. Tež do pólskeho Zgorzeleca su sej wulećeli.
