Ćisk (JT/SN). Na nazymski swjedźeń je ­Ćišćanske kulturne towarstwo minjeny sobotu na Ćišćanski statok přeprosyło. Słónco so na tym dnju přewšo rjenje směješe a postara so wo prawe swětło za nowy płót, kotryž běchu mužojo rjemjeslniskeje skupiny něšto dnjow do toho natwarili.

Tak swjedźeń z rańšim piwkom pod přewodom dujerskeje kapały Horjany ­zahajichu. Ze swojimi morawskimi dujerskimi zynkami přiwabjeja hudźbnicy stajnje wjele wopytowarjow, mjez druhim Mießnerec mandźelskeju z Hućiny a Gnaukecow z Kubšic. Hižo wot lěta 2008 woni dujersku kapału na jeje wustupach přewodźeja. Ze serbskimi chorhojemi z napisom „Fanclub Horjany“ na wose­bite wašnje na sebje skedźbnjeja.