Słona Boršć (UM/SN). Budyska měšćanska rada je na swojim zašłym posedźenju twarski plan za nowu wohnjowobornu gratownju we wjesnym dźělu Słona Boršć wobzamknyła. Z wida planowarjow tutomu předewzaću hižo ničo napřećo njesteji. „Město Budyšin trjeba jako nošer wohnjowych woborow na zapadźe měšćanskeho teritorija w Słonej Boršći nowe městno za wohnjowobornu gratownju“, rěka w planowanskich podłožkach. Dotalna gratownja na Handrija Zejlerjowej hižo twarskim, techniskim a funkcionalnym žadanjam njewotpowěduje a tež žane móžnosće rozšěrjenja njeskići.

Nowa gratownja ma bjezposrědnje južnje křižowanišća w Słonej Boršći za wobstejacymi bydlenskimi a přemysłowymi twarjenjemi nastać. „Nowe městno ma w centralnym dźělu wsy być. Wottud­ hodźa so předpisane časy zasadźenjow optimalnje docpěć“, we wobkrućenju rěka. Planowana je jednoposchodowa gratownja z městnom za tři jězdźidła, ze składom, sanitarnymi připrawami a kubłanskej rumnosću. Přijězd ma wot Słonoboršćanskeje dróhi być.