Na hłownej zhromadźiznje towarstwa zašłu dźěławosć wuhódnoćili

Łaz (AK/SN). W Domje Zejlerja a Smolerja we Łazu chcedźa tež přichodnje swoje kulturne namrěwstwo zachować a so stawiznam swojeje domizny wěnować. Tole je předsyda spěchowanskeho towarstwa Reinhardt Schneider minjeny kónc tydźenja na hłownej zhromadźiznje towarstwa podšmórnył. Při tym bilancowaše wón wólbnu dobu wot 2023 hač do 2025. Z přednoškami, čitanjemi, wustajeńcami, koncertami, wodźenjemi a wulětom skićachu swojim čłonam a dalšim zajimcam wotměnjaty program.

Derje wopytany bě serbski wječor 2024, jako je bajkarka Ute Fisch serbske bajki předstajiła. Runje serbski wječor ma wot lěta 2007 w towarstwje krute městno. 23. januara 2026 přednošuje stawiznarka Lubina Malinkowa wo pućowanskich dožiwjenjach Jurja Wawrika 1842 do Roma. Přednošk nawjazuje na adwentnu wustajeńcu wo młynach při Małej Sprjewi wot Hermanec hač do Rohólnja (Riegel). Přehladku wotewru prěnju adwentnu njedźelu, 30. nowembra.