Pančicy-Kukow (SN/MWj). Pod hesłom „Chłóšćenki a kultura“ zahaji kofejownja swjateho Michała w klóštrje Marijina hwězda w Pančicach-Kukowje 18. oktobra nowy slěd zarjadowanjow. W srjedźišću steja zajimawe wosobiny, kotrež ze swojeho žiwjenja powědaja, awtorojo, kotřiž swoje knihi předstajeja, a ludźo, kotřiž zajimawe pućowanske rozprawy prezentuja. Dalši wažny wobstatk zarjadowanjow su kulinariske chłóšćenki. Tak zeznaja wopytowarjo mjezynarodne družiny kofeja a smědźa so nad słódnymi kreacijemi klóšterskeje kofejownje wjeselić. Planowane su zarjadowanja najprjedy měsačnje w oktobru a nowembru 2025 kaž tež w januaru 2026. Dalše terminy organizatorojo přihotuja.

Prěni hósć budźe 18. oktobra direktor Zeleneho wjelba Drježdźanskich statnych wuměłskich zběrkow dr. Marius Winzeler. Při tym póńdźe wo jeho žiwjenske stacije a wo jeho zwisk ke klóštrej Marijina hwězda. Hósć w nowembru budźe mějićel rudnohórskeje firmy za wuměłske rjemjesło. W januaru witaja žurnalistku z pućowanskej rozprawu.