Budyšin (CS/SN). Solarnu připrawu wosebiteho razu su minjeny pjatk w Budyskim wuchodnym předměsće twarić započeli, a to na wotnožce hladarnje za starych ludźi na Židowje. Wosebitosć je, zo jedna so wo prěnju wot skupiny ludźi financowanu solarnu připrawu Budyšina.
Zwoprawdźenje projekta je Budyski klimowy zwjazk nastorčił. Tobias Mayer-Uhma z klimoweho zwjazka je kontakt k hladarni nawjazał a pola jednaćela Reinera Rogowskeho hnydom zajim zbudźił. Jako dalšeho partnera zdobychu energijowe drustwo Žitawa–Zhorjelc, kiž ma nazhonjenja nastupajo wobydlerske připrawy. Wone skići prawniski ramik a stara so tohorunja wo financny management.
Inwesticija wobjimuje 190 000 eurow. Tule sumu financuje 22 čłonow klimoweho zwjazka kaž tež energijowe drustwo. Solarna připrawa ma 175 kilowattowych hodźin miliny nadźěłać, prěnjorjadnje za hladarnju samu. Hižo kónc lěta 2025 ma připrawa dźěłać započeć. Wona ma tež na dobro regionalneho hospodarstwa być, přetož domjacy rjemjeslnicy maja ju natwarić. Jeničce solarne module dyrbja importować.