Budyšin. Znata serbska pianistka Hei­demarja Wiesnerec organizuje hižo 31. raz spočatk lěta wurjadne koncerty. To su koncerty wosebiteho razu, wšako pyta sej hudźbnica kóžde lěto serbskich komponistow, kotřiž jej nowe twórby poskićuja a jich prapředstajenje garantuja. Dale předstaja kompozicije, kiž su mjenje znate, ale so derje k hłownej ideji programa hodźa. A za to namaka wona stajnje nowych zajimawych a wurjadnych interpretow.

Załožba za serbski lud ju při tym podpěruje, ale mjeztym je Wiesnerec hišće mnoho dalšich spěchowarjow za tajki wosebity koncert na spočatku lěta našła. Dalši powabk drje su rjane koncertne městnosće. Lětsa su to kulturny dom Schwartzsche Villa w Berlinje, Schumannowy dom w Lipsku, Koporčanski hród pola Bukec, Serbski dom w Choćebuzu, žurla Serbskeho muzeja w Budyšinje a Wojerowski hród.