Budyšin (SN/MWj). Spěchowanski kruh za serbsku ludowu kulturu debjerjow jutrownych jejkow namołwja, so wobdźělić na 73. wubědźowanju wo najrjeńše serbske jutrowne jejko 2026 za dorosćenych. We wobłuku wubědźowanja mytuja jejka, kotrež su jedno- abo wjacebarbnje wóskowane resp. bosěrowane, škrabane abo wužrawane, z tradicionalnymi mustrami wuhotowane a z tradicionalnym gratom zhotowjene. Zajimcy móža so tež z wjacorymi technikami na wubědźowanju wobdźělić. Jednotliwe kolekcije měli wopřijimać tři wudute kokošace jejka, wudebjene po swójskich kreacijach a po swójbnych a regionalnych tradicijach. Debjerjo měli je pósłać Spěchowanskemu kruhej za serbsku ludowu kulturu, Póstowe naměsto 2, 02625 Budyšin. Wotpósłarjo njech připisaja swoje mjeno, adresu, starobu, mailowu adresu, telefonowe čisło a z kotrej techniku su jejka nastali. Kolekcije měli so hač do popjelneje srjedy, 18. februara, zapodać.