Njebjelčanscy wobornicy dóstanu awto za poł miliona eurow

Njebjelčicy (SN/MWj). Zo gmejna za swojich wohnjowych wobornikow nowe hašenske awto skaza, so přehusto njestawa. Tohodla bě wčerawše wobzamknjenje Njebjelčanskeje gmejnskeje rady do wěsteje měry historiske. Gmejnscy radźićeljo běchu sej přezjedni, zo maja Njebjelčanscy dobrowólni wohnjowi wobornicy nowe hašenske awto dóstać, a to za 500 000 eurow. Jich stare awto­ je dospołnje dodźeržane a so hižo porjedźić njeda. Tuž so hižo dlěši čas wo narunanje prócuja. Často rozhladuja so dźensa na trjebanym awtom. Ale tajke na wikach lědma hišće dóstanješ, ćim mjenje, hdyž dyrbi wone aktualnym žadanjam wotpowědować.