Loni je Biskopičan Eberhard Schmitt knihu wo pomnikach, kotrež w Budyšinje na wójny a wójnske podawki spominaja, wudał. Zawčerawšim je domizniski slědźer w Budyskej měšćanskej bibliotece twórbu z nimale 700 stronami předstajił.
Budyšin (CS/SN). Žurla měšćanskeje biblioteki běše połna, a nimale dwě a poł hodźiny su hosćo cyle putani wuwjedźenjam awtora připosłuchali. Tójšto nowych dopóznaćow su sej sobu domoj wzali. Eberhard Schmitt běše jich na wulět do stawiznow wot lěta 1002 hač do časa po wójnje lěta 1945 sobu wzał. Jara wobrazliwje rozprawješe na přikład wo bojach přećiwo husitam wot 1429 do 1431, na kotrež studnja na Budyskim Hłownym torhošću dopomina. Stawizniski swědk wuswobodźenskich wójnow přećiwo Napoleonej w lěće 1830 je mjez druhim Stara póstownja na Hošic hasy. Tež w zwisku z druhimi wójnami 19. lětstotka, mjez druhim Němsko-danskej wójnu w lěće 1864 a Němsko-francoskej wójnu 1870/ 71, je awtor někotružkuli pomjatnu městnosć mjenował.
