Łazowska gmejna wobchowa zakładnu šulu w swojim nošerstwje

Łaz (AK/SN). Přichod zakładneje šule Při Hórnikečanskim jězoru we Wulkich Ždźarach je srjedźno- a dołhodobnje zaručeny. Tole podšmórny Łazowski wjesnjanosta Thomas Leberecht (CDU) wutoru na posedźenju gmejnskeje rady. Jednohłósnje su so radźićeljo za pokročowanje komunalneho nošerstwa zakładneje šule wuprajili. We wobłuku planowanja šulskeje syće Budyskeho wokrjesa su gmejny tuchwilu namołwjene, šule w swojim nošerstwje posudźować. „Tole je gmejnske zarjadnistwo činiło a njeje wohroženje zakładneje šule we Wulke Ždźarach zwěsćiło“, informowaše wjesnjanosta přitomnych a doda: „Tuchwilu móžemy wšitke lětniki w dwěmaj čaromaj dale wjesć.“ Hakle, hdyž by cyłkowna ličba šulerjow pod 60 spadnyła abo w jednej rjadowni jenož hišće 15 šulerjow było, „by situacija kritiska była. Tomu pak tuchwilu tak njeje“, podšmórny Leberecht.