Za dalewobstaće Budyskeje hwězdarnje so dwě towarstwje angažujetej

Budyšin (SN/MiP). Spěchowanske towarstwo šulska hwězdarnja Budyšin přeprošuje sobotu na dźeń wotewrjenych duri do „jedneje z najstaršich a najwjetšich hwězdarnjow Němskeje“, kaž ju Budyski měšćanski zarjad na swojej internetnej stronje wopisuje. Sy-li na Čornobóskej dróze w Budyskim parku přirody po puću, nadeńdźeš před ležomnosću z charakteristiskimaj kupolomaj jenož kruće zamknjene wrota. Wótřerěčak při klinkačku mjelči, po tym zo sy zaklinkał, a tež tafličku z wotewrjenskimi časami podarmo pytaš.