Po lońšej maturje na Serbskim gymnaziju w Budyšinje je Nukničanka Hana Nukec žiwjenje na juhozapadźe Europy ze­znała: Hač do januara dźěłaše wona w Barcelonje w mjezynarodnej pěstowarni. W kosmopolitiskej stolicy regiona Katalonskeje njeje jenož pilnje španišćinu wuknyła, ale tež dožiwjała, kak Katalanojo za swoju rěč a kulturu wojuja. W tym je 18lětna wjele paralelow ze Serbami spóznała, najebać to, zo je Katalanow wjele wjac hač Serbow. Potom je z přećelku ze Španiskeje do Marokka lećała, sej krótkodowol w Marakešu popřała a tamniše žiwjenske wašnje zeznała. W februaru a měrcu poby zaso w Španiskej, tón raz w Sevilli a Andaluziskej a chodźeše na kurs španišćiny. Nětko Hana Nukec hač do kónca meje w redakciji Serbskich Nowin (SN) dźěła. Nastork je wot Celiny Knopec dóstała, kiž bě jej wo swojich nazhonjenjach w teamje SN powědała.