Wokrjes wětrnikam mjez Běłym Chołmcom a Hórnikecami přizwolił

Łaz (AK/SN). Z wěstymi wobmjezowanjemi je Budyski wokrjes twar pjeć wulkich milinowych wětrnikow mjez Běłym Chołmcom a Hórnikecami dowolił. Tole je Łazowski wjesnjanosta Thomas Leberecht (CDU) na zašłym posedźenju gmejnskeje rady zdźělił. Do připrawow chce firma SaboWind z Freiberga inwestować. Hač do 23. awgusta hodźa so znapřećiwjenja w krajnoradnym zarjedźe zapodać. Wjetšina wot lěta 2024 skutkowacych gmejnskich radźićelow so přećiwo projektej wobara.

Mjez Běłym Chołmcom a Hórnikecami ma na 150 hektarach park wětrnikow nastać. SaboWind chce tam pjeć wětrnikow z cyłkownym wukonom 36 megawattow natwarić. Při tym jedna so wo moderne připrawy typa Vestas V 172. Hač k tak mjenowanej gondli budu sćežory 199 metrow wysoke, z wokřidłami pak 285 metrow. Wětrniki maja hišće lětsa nastać.