Wojerecy (SN/MWj). Nowej wobydlerce ma wot njedawna Wojerowski zwěrjenc. Dwě małej wóslicy stej tam zaćahnyłoj, zamołwita za zjawnostne dźěło zwě­rjenca Stefanie Jürß w nowinskej zdźělence informuje. Něhdźe połdra lěta starej wóslicy Ruby a Hilžbjeta stej ze zwěrjenca w Bernburgu do Wojerec přišłoj a so dotalnej wóslacej trójce Katji, Maili a Ricky přidružiłoj.

Tute jej wobčuchachu a takrjec testowachu, hač so „tej nowej“ za žiwjenje w stadle hodźitej. Z tym wotběža prěnje zetkanje cyle po wóslacym wašnju. Hdyž bě prěnje rozpjeršenje nimo, bórze zaso měr do hajnišća zaćahny a prěnju snědań sej zwěrjata hižo zhromadnje słodźeć dachu.

Małe wosoły pochadźeja ze srjedźomórskich kupow, předewšěm ze Sardi­niskeje a Sicilskeje, a słušeja k najmjeńšim družinam domjacych wosołow. Zwjetša su wone hač ke chribjetej niše hač meter a skutkuja tuž skerje něžne. Po charakteru pak so swojim wulkim bratram a sotram runaja. Su robustne, ­wutrajne a móža najebać swoju snadnu wulkosć tójšto nosyć.