Z Nadźiju po žiwych serbskich impresijach kolesowali

Malešecy (LK/SN). Wjac hač 20 kolesowarjow wobdźěli so minjeny pjatk na kolesowanju po žiwych serbskich impresijach w kónčinje sewjerowuchodnje Budyšina. Kolesowanje bě towarstwo Nadźija organizowało. Mjez wobdźělnikami běchu nimo zajimcow z Rakec, Malešec a Skanec tež mnozy kursisća ferialneho kursa serbšćiny, kotryž Serbski institut tuchwilu zarjaduje.

Po starće w Malešecach wjedźeše prěnja etapa do Brězynki (Briesing), hdźež wopytachu dom Arnošta Barta, prěnjeho předsydy Domowiny. Jich přewodnik za wšelake stacije běše ekstra spřihotowany kwis. Tak na přikład zhonichu, hdźe je so Arnošt Bart narodźił, kotry ludowy spěw Handrija Zejlerja je w Malešecach nastał, a kotry štom so za „prawej włóskej worješinje“ chowa. Dalši wjeršk běše wopyt Klukšanskeje cyrkwje, hdźež dyrbjachu serbski napis namakać. A nadobo zaspěwachu samo „Laudate ommes gentes“, serbsce, łaćonsce a němsce.