Po njewšědnym wohenju w składźe baterijow njeje hišće wšo jasne

Budyšin (SN/jp). Skład za baterije, kotryž je so před tydźenjomaj na Schliebenowej w Budyšinje połdra dnja palił, zjawnosć dale zaběra. Baterije, kotrež běchu tam instalowane, mějachu chabłanja miliny wurunać. Serbske Nowiny su wospjet wo tym rozprawjeli, sej pad mjeztym bliže wobhladali a měšćanskemu zarjadej swoje prašenja w tym zwisku sposrědkowali. Nětko su wotmołwy dóšli.

Litium-ionowe baterije su jara sensibelne a móža tohodla małe chabłanje miliny w krótkim času wurunać. Mnóstwo palacych so baterijow wotpowědowaše něhdźe 20 do 30 baterijam za elektroawta. Wotpowědnje wulke bě z tym mnóstwo škódnych emisijow – jako by so hač do 30 e-awtow paliło. „Wohnjowi wobornicy běchu we wotpowědnej škitnej drasće a wjetšina hašenskich dźěłow bě awtomatizowana. Přez cyły čas so emisija měrješe, při čimž pak žane wuskutki spóznać njeběchu. Wšitcy wobdźěleni su wurjadnje dźěłali“, piše André Wucht, nawoda běrowa wyšeho měšćanosty Karstena Vogta (CDU).